Kuri uyu wa gatatu tariki 4 Werurwe 2026 harakinwa imikino 3 ya Shampiyona y’ikiciro cya mbere muri basketball mu Rwanda, imikino yose irakinirwa muri Petit Stade i Remera.
Uyu munsi uraba ari umunsi wa 11 wa Shampiyona ya Baskteball mu Rwanda mu kiciro cy’abagabo.
AZOMCO 15:30 UGB
AZOMCO ntabwo yatangiye Shampiyona neza kuko kugeza kuri ubu iyi kipe y’umutoza Daniel Monibe Lino Todo imaze gutsinda umukino umwe gusa mu mikino 5 imaze gukina muri Shampiyona. Uyu ni umwaka wayo wa kabiri ikina imikino y’ikiciro cya mbere.
UGB nk’ikipe yakinnye imikino ya kamarampaka mu mwaka ushize w’imikino nayo ntabwo ari ikipe yatangiye Shampiyona neza kuko yatangiye itsindwa imikino 3 yikurikiranya harimo n’uwo yatsinzwemo na EAUR ikizamuka uyu mwaka.
N’ubwo UGB yatangiye nabi uyu mwaka ariko ntibikuraho ko imaze imikino ibiri yikurikiranya itsinda harimo n’uwo yatsinze REG BBC amanota 85-77, bivuze ko mu mikino 5 ya Shampiyona UGB imaze gukina uyu mwaka yatsinzemo imikino 2, itsindwa imikino 3.
N’ubwo UGB itatangiye Shampiyona neza ariko ntibikuraho ko ifite abakinnyi bari kwitwara neza barimo Amotoe James Kofi ufite agahigo ko kuba ariwe mukinnyi umaze gutsinda amanota menshi mu mukino umwe kugeza aho Shampiyona igeze ubu kuko yatsinze amanota 32.
EAUR BBC 18:00 REG BBC
EAUR BBC ni ikipe izamutse mu kiciro cya mbere uyu mwaka ariko ibyo ntibikuraho ko ikomeje gutungurana muri Shampiyona itsinda amakipe asanzwe ari ibigugu mu kiciro cya mbere aho yivuganye amakipe arimo UGB na Patriots BBC. Kugeza ubu mu mikino 4 EAUR y’umutoza Imena Munyakazi Aime imaze gukina yatsinzemo imikino 2, itsindwa imikino 2. Iyi ni ikipe yo kwitega kuri uyu mugoroba.
REG BBC nk’ikipe isanzwe ikomeye muri Shampiyona igiye gukina uyu mukino mu gihe iheruka gutsindwa na UGB. Kugeza ubu REG imaze gukina imikino 4 muri Shampiyona, yatsinzwe umukino umwe, itsinda imikino 3 harimo n’uwo yatsinzemo ikipe ya Tigers BBC amanota 69-55.
Muhizi Prince niwe umaze gutsindira REG BBC amanota menshi aho amaze kuyitsindira amanota 64.
Kepler BBC 20:30 Patriots BBC
Kepler BBC imaze gukina imikino 4, yatsinzemo imikino 2, itsinda imikino. Iyi kipe ifashwa cyane na Chad Bowie Jordan umaze kuyitsindira amanota 69 kuva Shampiyona yatangira yatsinzwe imikino yose ikomeye irimo uwo yatsinzwe na APR BBC na Tigers BBC.
Patriots BBC yagiye gutangira Shampiyona itakaza abakinnyi benshi kuri ubu imaze gukina imikino 4 muri Shampiyona yatsinzemo imikino 2, itsindwa imikino 2. Patriots BBC iri gufashwa n’abarimo Damaria Franklin, Kwizera Sage Hubert na Garba Chingka Kennedy ikagerageza kwitwara neza ariko ntabwo birakunda neza.
Mbere y’uko imikino yo kuri uyu wa gatatu ikinwa, urutonde rw’agateganyo rwa Shampiyona ruyobowe na Tigers BBC n’amanota 11 (Yatsinze imikino 5, itsindwa 1), APR BBC ni iya kabiri n’amanota 9 (Yatsinze imikino 4, itsindwa 1), UGB ni iya gatatu n’amanota 7 (Yatsinze imikino 2, itsindwa 3), inganya na REG ya kane (Yatsinze imikino 3, itsindwa 1).
Ikipe ya EAUR BBC yazamutse uyu mwaka iri ku mwanya wa gatanu n’amanota 6 (Yatsinze imikino 2, itsindwa 2), inganya na Patriots BBC ya gatandatu (Yatsinze imikino 2, itsindwa 2), Kepler BBC ya karindwi (Yatsinze imikino 2, itsindwa 2) na AZOMCO ya munani (Yatsinze umukino 1, itsindwa 4), naho Inspired Generation yazamutse uyu mwaka iri ku mwanya wa nyuma n’amanota 5 (Yatsinzwe imikino 5 yose imaze gukina).
