Ijoro ryo kuri uyu wa gatatu tariki 27 Kanama 2025 ryasize hamenyekanye amakipe 4 yiyongeraga kuri 32, yuzura amakipe 36 azakina ahatanira Igikombe Gihuza Amakipe yabaye aya mbere iwayo ku mugabane w’i Burayi, UEFA Champions League.
Nyuma y’uko ku wa kabiri amakipe atatu arimo Kairat Almaty yo muri Kazakhstan, Pafos FC yo muri Cyprus na Bodoe/Glimt yo muri Norway zabonye itike yo kuzakina imikino ya UEFA Champions League binyuje mu ijonjora (Qualification), kuri uyu wa gatatu hagombaga kumenyekana andi makipe ane abona itike.
Qarabag FK yo Azerbaijan yaje gusezerera Ferencvárosi yo muri Hungary ku giteranyo cy’ibitego 5-4, Benfica yo muri Portugal yasezereye Fenerabache yo muri Turkey y’umutoza Jose Mourinho ku giteranyo cy’igitego 1-0, Club Brugge yo mu Bubiligi yasezereye Rangers yo muri Scotland ku giteranyo cy’ibitego 9-1 naho FC Copenhagen yo muri Denmark yasezereye FC Basel yo mu Busuwisi ku giteranyo cy’ibitego 3-1.
Aya makipe ane yaraye abonye itike yo gukina imikino ya UEFA Champions League yahise yuzuza amakipe 36 azakina iri rushanwa, aya makipe agabanyije mu dukangara tune (4) mbere y’uko tombola iba. Buri gakangara karimo amakipe 9.
Tombola y’uko amakipe azakina muri UEFA Champions iraba kuri uyu wa kane tariki 28 Kanama saa kumi n’ebyiri z’umugoroba ku isaha y’i Kigali, irabera i Monaco muri Grimaldi Forum.
Amwe mu mategeko n’amabwiriza yerekeye tombola ni uko buri kipe izajya itombora amakipe abiri muri buri gakangara ariko ntishobora gutombora ikipe baba mu gihugu kimwe ndetse ntishobora gutombora amakipe abiri yo mu gihugu kimwe.
Ikindi ni uko mu makipe abiri ikipe izajya itombora mu gakangara kamwe, umukino umwe izajya iwakira naho indi ijye gusura.
Amakipe 36 azakina UEFA Champions League uyu mwaka ni:
- Paris Saint Germain (France)
- Marseille (France)
- AS Monaco (France)
- Tottenham Hotspur (Ubwongereza)
- Liverpool (Ubwongereza)
- Arsenal (Ubwongereza)
- Manchester City (Ubwongereza)
- Chelsea (Ubwongereza)
- Newcastle United (Ubwongereza)
- FC Barcelona (Espagne)
- Real Madrid (Espagne)
- Atletico Madrid (Espagne)
- Athletic Club (Espagne)
- Villareal (Espagne)
- Napoli (Italy)
- Inter Milan (Italy)
- Atalanta (Italy)
- Juventus (Italy)
- Bayern Munich (Ubudage)
- Bayer Leverkusen (Ubudage)
- Eintracht Frankfurt (Ubudage)
- Borussia Dortmund (Ubudage)
- PSV Eindhoven (Ubuholandi)
- Ajax Amsterdam (Ubuholandi)
- Sporting CP (Portugal)
- Benfica (Portugal)
- Union Saint-Gilloise (Ububiligi)
- Club Brugge (Ububiligi)
- Galatasaray (Turkey)
- Slavia Praha (Czech Republic)
- Olympiacos (Ubugereki)
- Bodo/Glimt (Norway)
- Copenhagen (Denmark)
- Kairat Almaty (Kazakhstan)
- Pafos (Cyprus)
- Qarabag (Azerbaijan)