Al Ahly yo mu Misiri yegukanye igikombe cya FIBA Women’s Basketball League Africa 2025 cyaberaga i Cairo itsinze Ferroviario de Maputo yo muri Mozambique, APR WBBC yo mu Rwanda yongera kwegukana umwanya wa gatatu.
Kuri iki cyumweru tariki 14 Ukuboza 2025 hasojwe irushwanwa rya FIBA Basketball Africa League 2025 rihuza amakipe yabaye aya mbere iwayo mu bagore, ryaberaga i Cairo mu Misiri kuri Prince Abdallah Al Faisal Sports Hall.
APR yo mu Rwanda nyuma yo gusezererwa na Al Ahly muri 1/2 yakinnye na ASC Ville de Dakar yo muri Senegal mu guhatanira umwanya wa gatatu.
APR yabashije kwegukana umudari wa bronze itsinze amanota 90-84, Destiney Promise Philoxy yitwaye neza muri uyu mukino atsinda amanota 31, akora rebounds 3, atanga imipira 5 yavuyemo amanota (Assits) ndetse akora steals (Kwiba umupira) ebyiri.
Klerstan Bell ukinira APR yaciye agahigo muri uyu mukino ko kuba umukinnyi wa mbere wakoze blocks (ibihomo) nyinshi mu mukino umwe, yakoze ibihomo 8 muri uyu mukino.
Ikipe ya REG nayo yahagarariye u Rwanda yakinnye na CNSS yo muri Repubulika Iharanira Demokarasi ya Congo mu mukino wo guhatanira umwanya wa 7, uyu mukino REG yawutsinze ku manota 77-72.
Umukino wa nyuma wahuje Al Ahly yakiriye iyi mikino na Ferroviario de Maputo yarifite igikombe giheruka. Aya makipe ni ku nshuro ya gatatu yarahuriye ku mukino wa nyuma, mu nshuro ebyiri zabanje muri 2019 na 2024 zose Ferroviario de Maputo yari yatsinze Al Ahly.
Kuri iyi nshuro ya Al Ahly yihoreye itsinda umukino ku manota 77-51 ndetse yegukana igikombe imbere y’abafana ibihumbi 3 bari buzuye Prince Abdullah Al-Faisal Sports Hall isanzwe ikiniraho.
Umukinnyi mwiza w’irushanwa (MVP) yabaye Raneem Elgedawy ukinira Al Ahly.
Uko amakipe yakurikiranye muri rusange:
- Al Ahly SC
- Ferroviario de Maputo
- APR WBBC
- ASC Ville de Dakar
- Sporting Clube de Luanda
- KPA WBBC
- REG WBBC
- CNSS
- FAP WBBC
- First Bank BBC
- Friend’s Basketball Association
- Brave Hearts BBC