Ikipe ya Gisagara VC mu bagabo na Police WVC mu bagore zegukanye igikombe cya BK Arena Volleyball Cup 2025 cyakinwaga ku nshuro yacyo ya mbere muri BK Arena.
Gisagara VC yatwaye igikombe itsinze APR VC amaseti 3-0 (25-22, 25-12, 25-10) naho Police yagitwaye itsinze APR amaseti 3-0 (25-21, 26-24, 27-25), iyi mikino yombi yabaye kuri uyu wa gatandatu tariki 13 Ukuboza 2025.
Amakipe ya Kepler mu bagabo n’abagore niyo yegukanye umwanya wa gatatu.
Mu bagore Kepler yatsinze RRA amaseti 3-2 (25-12, 17-25, 22-25, 25-23, 15-11) naho mu bagabo yatsinze Police amaseti 3-1 (23-25, 25-19, 25-22, 25-16).
Ikipe zabaye iza mbere zahawe igikombe giherekejwe n’ibahasha y’amafaranga miliyoni 2.5, izabaye iza kabiri zahawe imidari ya feza iherekejwe n’ibahasha ya miliyoni 2 naho ikipe zabaye iza gatatu zahawe imidari ya bronze iherekejwe n’ibahasha ya miliyoni 1 y’amafaranga y’u Rwanda.
Irushanwa rya BK Arena Volleyball Cup ni irushanwa ryateguwe n’ubuyobozi bwa BK Arena ku bufatanye n’Ishyirahamwe ry’Umukino wa Volleyball mu Rwanda, FRVB.
Iri rushanwa ni ubwa mbere ryari rikinwe ndetse ryongeye gutuma volleyball ikinirwa mu nyubako ya BK Arena dore ko yaherukaga kuberamo muri 2023 ubwo habaga irushanwa rya Zone V Club Championship.
Iri rushanwa ryitabiriwe n’amakipe yarangije igice cya mbere cya Shampiyona (Phase 1) ari mu makipe ane ya mbere, ikipe ya mbere yahawe guhura n’ikipe ya kane naho ikipe ya gatatu ihura n’iya kabiri.
Ku wa gatanu tariki 12 Ukuboza 2025 nibwo irushanwa rya BK Arena Volleyball Cup ryatangiye gukinwa kuva saa munani z’amanywa.
Mu bagore APR ya mbere ku rutonde rwa Shampiyona yageze ku mukino wa nyuma itsinze RRA ya kane amaseti 3-0 (25-12, 25-18, 25-22) naho Police igera ku mukino wa nyuma itsinze Kepler amaseti 3-0 (28-26, 28-26, 25-14).
Mu bagabo Gisagara ya mbere ku rutonde rwa shampiyona yageze ku mukino wa nyuma itsinze Police amaseti 3-0 (25-21, 25-19, 27-25) naho APR ya kabiri igera ku mukino wa nyuma itsinze Kepler ya gatatu amaseti 3-1 (25-19, 25-21, 19-25, 25-14).