Kuri uyu wa gatanu tariki 14 Ugushyingo 2025 Shampiyona y’u Rwanda ya volleyball irakomeza hakinwa imikino 2 y’umunsi wa 5 mu bagabo n’umukino umwe w’umunsi wa 4 mu bagore, imikino yose irabera muri Petit Stade.
Mu kiciro cy’abagore umukino umwe uri bube urahuza Police y’umutoza Hatumimana Christian na Kepler y’umutoza Siborurema Florien saa 18:00 z’umugoroba.
Police ntiratsindwa na rimwe muri Shampiyona nyuma y’imikino ibiri imaze gukina mu gihe Kepler n’ubwo yatangiye nabi Shampiyona itsindwa na APR amaseti 3-1, nayo imaze imikino gutsinda imikino ibiri ikurikirana.
Uyu uraza kuba ari umukino ukomeye dore ko Kepler iri gukina umwaka wayo wa kabiri muri Shampiyona nyuma yo kugura abakinnyi bashya barimo Makuto Violet, Chepleting Daisy, Omondi Marion, Musaniwabo Hope n’abandi ishaka kwerekana ko ari ikipe yazanye ingamba nshya muri uyu mwaka, umwaka ushize yari yasoreje ku mwanya wa kane.
Indi mikino itegerejwe kuri uyu wa gatanu ni iyo mu kiciro cy’abagabo, saa 16:00 z’umugoroba REG iratana mu mitwe na RP Ngoma.
REG VC y’umutoza Mugisha Bavuga Benon yari yabashije kwegukana amanota 3 mu mikino ibiri mu cyumweru gishize nyuma yo gutsinda umukino umwe wa Kirehe, igatsindwa na Police VC.
REG ishobora gukina idafite Thor Magembo utaramera neza n’ubwo yakinnye umukino wa Police yitezweho kongera kubona amanota 3 imbere ya RP Ngoma imaze gutsinda umukino 1 muri 3 imaze gukina.
Umukino ukomeye kurusha indi uri bukinwe kuri uyu wa gatanu urahuza Gisagara VC itaratsindwa na rimwe muri Shampiyona n’ikipe ya APR VC saa 20:00.
Uyu ni umukino ukomeye kuko urahuza abatoza beza muri Shampiyona, Yakan Guma Lawrence wa Gisagara na Sammy Mulinge wa APR VC.
Amakipe ku mpande zombi afite abakinnyi bakomeye ndetse bamwe muri bo bakiniye amakipe yombi barimo Mutabazi Yves na Niyonshima Samuel bakinira APR ariko banyuze muri Gisagara, hiyongeraho na kapiteni Kanamugire Prince warikumwe na Gisagara muri 2022 ubwo yegukanaga umwanya wa 3 mu mikino Nyafurika.
Ku ruhande rwa Gisagara nayo ifite abakinnyi bakiniye na APR VC barimo Gatsinzi Venuste, Muvara Ronard na passeur Ngaboyintwari Cedrick.
Gisagara imaze gukina imikino 4 muri Shampiyona y’uyu mwaka ndetse yose yarayitsinze naho APR imaze gukina imikino 3, yatsinzemo imikino 2, itsindwa umukino umwe yatsinzwemo na Kepler amaseti 3-0 i Gisagara.
Icyumweru gishize APR inyuza ku mbuga nkoranyambaga zayo ubutumwa butandukanye bukangurira abafana bayo kujya kuyitera ingabo mu bitugu, ibi bigaragaza inyota yo gutsinda Gisagara.
Ku ruhande rwa Gisagara ntabyinshi yigeze ivuga mbere y’umukino gusa ni imwe mu makipe yo kwitega dore ko yamaze kwirenza andi makipe akomeye mu Rwanda arimo Kepler na Police kandi zose yazikuyeho amanota 3 imbumbe.