Kuri uyu wa kabiri tariki 24 Werurwe 2026, Minisitiri wa Siporo, Madamu Nelly Mukazayire yasuye ikipe ya RSSB ikomeje imyiteguro yitegura kuzahagararira u Rwanda mu mikino ihuza amakipe yabaye aya mbere iwayo ku mugabane w’Afurika, Basketball Africa League (BAL) izaba ikinwa ku nshuro yayo ya gatandatu.
Minisitiri Mukazayire yifurije ikipe ya RSSB Tigers ishya n’ihirwe ndetse abwira abakinnyi ko bashyigikiwe byuzuye muge cyose bakiri mu irushanwa.
Ikipe ya RSSB Tigers nayo yijeje Minisitiri ko izakora ibishoboka byose mu kibuga igahagararira u Rwanda neza.
Kuva BAL yatangira gukinwa muri 2021 ni ubwa mbere ikipe ya RSSB Tigers igiye kwitabira iri rushanwa.
Mu mikino y’amatsinda, RSSB Tigers izakinira mu itsinda rya Kalahari rizakinira i Pretoria muri Afurika y’Epfo muri SunBet Arena. Muri iri tsinda izaba iri kumwe n’andi makipe arimo Johannesburg Giants yo muri Afurika y’Epfo, Al Ahly Ly yo muri Libya, Dar City yo muri Tanzania, Nairobi City Thunder yo muri Kenya na Petro de Luanda yo muri Angola.
RSSB Tigers izatangira urugendo rwayo muri BAL tariki 27 Werurwe 2026 ikina na Al Ahly Ly yo muri Libya. Imikino y’itsinda rya Kalahari izaba yatangiye kuri uyu munsi, isozwe tariki 5 Mata 2026.
Nyuma y’imikino y’amatsinda, amakipe 8 (Amakipe 4 ya mbere muri buri tsinda) azaba yageze mu mikino ya nyuma azahurira i Kigali muri BK Arena kuva tariki 22-31 Gicurasi 2026.
Irindi tsinda ryitwa Sahara rizakinira i Rabat muri Morocco kuva tariki 24 Mata kugeza tariki 3 Gicurasi 2026, iri tsinda naryo ririmo amakipe 6 arimo FUS de Rabat yo muri Morocco, Al Ahly yo mu Misiri, ASC Ville de Dakar yo muri Senegal, JCA Kings yo muri Côte d’Ivoire, Club Africain yo muri Tunisia na Maktown Flyers yo muri Nigeria.
Ese RSSB Tigers yiteguye gute imikino ya BAL 2026
Nyuma y’uko ikipe ya RSSB Tigers itoranyijwe ko ariyo izahagararira u Rwanda mu mikino ya BAL 2026 isimbuye APR BBC yikuye mu irushanwa yahise itangira kureba uko yakongera ingufu mu mikino yayo haba mu bakinnyi no mu batoza.
Mu kongera imbaraga mu bakinnyi, RSSB Tigers yamaze kwiyambaza abakinnyi 6 bakiniraga APR BBC yari yiteguye iyi mikino ngo bazayifashe muri BAL.
Mu bakinnyi RSSB Tigers yiyambaje basanzwe bakinira APR BBC barimo Axel Mpoyo, Ntore Habimana, Ndizeye Dieudonne, Mangok Mathiang, Teafale Leonard Jr na Graig Leonard Randle.
RSSB Tigers yiyambaje n’abandi bakinnyi bo mu makipe yo muri Shampiyona y’u Rwanda barimo Cyiza Chandelier wa Kepler BBC na Furaha Cadeaux de Dieu wa REG BBC.
Aba baje basanga abandi bakinnyi basanzwe bakinira RSSB Tigers barimo Antino Jackson, Hagumintwari Steven, Bizimana Paul, na Viny Okouo.
Mu gice cy’ubutoza, RSSB Tigers yiyambaje James Maye usanzwe ari umutoza mukuru wa APR BBC, uyu akaba azaba ari umutoza wungirije nyuma y’umutoza Henry Mwinuka usanzwe ari umutoza mukuru w’iyi kipe ya RSSB Tigers.
Gasana Kenneth usanzwe ari umutoza wungirije wa RSSB Tigers n’ubundi azajyana n’iyi kipe ariko ari umutoza wa kabiri wungirije.
Biteganyijwe ko RSSB Tigers izahaguruka i Kigali yerekeza muri Afurika y’Epfo kuri uyu wa gatatu tariki 25 Werurwe 2026.
RSSB Tigers yegukanye igikombe cya Rwanda Cup cy’umwaka ushize w’imikino n’Igikombe kiruta ibindi (Rwanda Super Cup) igiye gukina BAL mu gihe muri Shampiyona y’uyu mwaka yatangiye yitwara neza aho imaze gukina imikino 6, yatsinzemo imikino 5, itsindwa umukino umwe.
