I Kigali mu Rwanda hagiye kubera imirwano y’iteramakofe (Boxing) muri Zaria Court yateguwe na Silverback Sports ku bufatanye n’Ishyirahamwe ry’Umukino w’Iteramakofe mu Rwanda.
Iyi mirwano izaba mu ijoro ryiswe “Kigali Fight Night” iteganyijwe ku wa gatandatu tariki 8 Ugushyingo 2025 kuva saa kumi n’ebyiri z’umugoroba (18:00) ikaba yitezweho gusiga amateka mu mukino w’iteramakofe wo ku mugabane w’Afurika.
Uyu munsi uzahuriza hamwe abakinnyi b’iteramakofe baturutse mu bihugu bitandukanye byo muri Afurika birimo u Rwanda, Nigeria, Tanzania, Cameroon, Gabon, Kenya na Repubulika Iharanira Demokarasi ya Congo (DR Congo).
Muri iri joro hazaba imikino 7 y’ababigize umwuga (Professional bouts) hamwe n’imikino 5 y’abatarabigize umwuga mu rwego rwo kugaragaza impano nshya ziturutse mu Rwanda.
Umurwano nyamukuru uzaba muri iri joro uzahuza umunya-Cameroon Tamba Merlin na Jonathan Katompa wo muri DR Congo.
Mu yindi mirwano, Jerry (DR Congo) azisobanura na Ally (Tanzania), Hans (Gabon) azisobanura na Joseph (Tanzania), David (Nigeria) azisobanura na Aziz (Tanzania), Precious (Nigeria) azisobanura na Flora (Tanzania), Daniella (DR Congo) azisobanura na Mukami (Kenya) naho Frank (Rwanda) yisobanure na Nelson (Gabon).
Amatike yo kwinjira kuri iyi mirwano ari kugurirwa kuri ticqet.rw aho arimo ibyiciro bine birimo amatike ya Bronze agura ibihumbi 10 (10,000 RWF), Silver agura ibihumbi 17 (17,000 RWF), Platinum VIP agura ibihumbi 60 (60,000 RWF) na Diamond VVIP agura ibihumbi 100 (100,000 RWF).