Umukinnyi ukomoka muri Uruguay wakinaga nka rutahizamu Edinson Roberto Cavani Gómez yasezeye ku gukina umupira w’amaguru nk’umukinnyi wabigize umwuga ku myaka 38 y’amavuko.
Mu butumwa bwo gusezera kuri ruhago Cavani yacishije ku mbuga nkoranyambaga kuri iki Cyumweru tariki 28 Ukuboza 2025 yagize ati,”Warakoze cyane ruhago! Wangize uwo ndiwe, umpa isomo ry’ubuzima, unyigisha guhaguruka mu gihe naguye no guha agaciro buri ntambwe y’urugendo. Wampaye gukabya inzozi zange n’umvaga ko zitashobokaga, umpa no guhura n’abantu b’ibitangaza yaba mu kibuga no hanze yacyo.
Ibi byose ntanakimwe cyari kubaho ntafite umuryango wange, inshuti zange, abakinnyi bagenzi bange, abatoza, hanyuma ya byose, abantu muri rusange. Urukundo rw’abafana mu bihugu byose no mu ikipe zose ni intwaro nzitwaza ubuziraherezo.
Ngiye mu mahoro, ntuje kuko numva ko natanze buri kimwe narimfite haba mu myitozo no mu kibuga. Yaba mu makosa no mu gutsinda ndashimira uyu mwuga (Ruhago) wampaye byinshi.”
Edinson Cavani yavutse tariki 14 Gashyantare 1987, avukira i Salto muri Uruguay. Yatangiriye gukina umupira w’amaguru mu ikipe y’abato ya Danubio y’iwabo muri Uruguay hagati ya 2000 na 2005 mbere y’uko yerekeza mu ikipe nkuru yakiniye imyaka ibiri muri 2005-2007.
Cavani yakomereje mu ikipe ya Palermo yo mu Butaliyani muri 2007-2011, harimo umwaka umwe yamutije muri Napoli nayo yo mu Butaliyani ari nayo yahise yerekezamo ayikinira muri 2011-2013.
Cavani yavuye muri Napoli yerekeza muri Paris Saint Germain mu Bufaransa ari naho yubatse ibigwi cyane mu myaka 7 yahamaze kuva muri 2013-2020 mbere yo kwerekeza muri Manchester United yamaze imyaka ibiri, ubundi yerekeza muri Valencia muri Espagne yamaze umwaka umwe abona kwerekeza muri Boca Juniors yo muri Argentine ari nayo yakiniraga kugeza ubu.
Muri rusange Cavani yakinnye imikino 745, atsinda ibitego 404, atanga imipira 79 yavuyemo ibitego mu makipe yose yakiniye. Yatwaye ibikombe 25 birimo Shampiyona y’Ubufaransa yatwaye inshuro 6 mu ikipe ya Paris Saint Germain, igikombe cy’igihugu mu Bufaransa yatwaye inshuro 6, Igikombe cy’igihugu mu Butaliyani yatwaye inshuro 1 n’ibindi.
Cavani yakiniye ikipe y’igihugu ya Uruguay imikino 136 ayitsindira ibitego 58, atanga imipira 17 yavuyemo ibitego kuva muri 2008 yayikinira umukino we wa mbere ndetse yayihesheje gutwara igikombe cya Copa America muri 2010/11.
Mu bihembo bye ku giti cye, Cavani yatwaye igihembo cy’umukinnyi w’umwaka wa Paris Saint Germain muri 2017, yahembwe nk’umukinnyi watsinze ibitego byinshi muri Shampiyona y’Ubufaransa inshuro 2 muri 2016/17 no muri 2017/18 n’ibindi.
Cavani nka rutahizamu azibukirwa ku gukora cyane mu kibuga, ubuhanga mu kwataka imipira no kwihuta cyane ndetse n’uburyo atapfaga gutsindwa imipira yo mu kirere.
