Eberech Eze yanditse amateka mu mukino Arsenal yatsinzemo Tottenham

By
Masakombe Guillaume
-
Eberech Eze niwe mukinnyi wa mbere watsinze ibitego 3 mu mukino wa Shampiyona wa "North London Derby"

Umwongereza Eberech Eze ukinira Arsenal yaciye uduhigo dutandukanye nyuma yo gutsinda ibitego 3 mu mukino w’umunsi wa 12 wa Shampiyona y’Ubwongereza, English Premier League warangiye Arsenal itsinze Tottenham Hotspur ibitego 4-1.

Kuri iki cyumweru tariki 23 Ugushyingo 2025, Arsenal yari yakiriye Tottenham Hotspur mu mukino uzwi nka “North London Derby” cyane ko aya makipe yombi abarizwa mu Majyaruguru y’umurwa mukuru w’Ubwongereza London.

Uyu mukino warangiye Arsenal itsinze Tottenham Hotspur ibitego 4-1 harimo ibitego 3 byatsinzwe na Eberech Eze ukinira Arsenal ku munota wa 41, 46 na 76 n’igitego cya Leandro Trossard cyo ku munota wa 36 naho igitego kimwe rukumbi cya Tottenham cyatsinzwe na Richarlison ku munota wa 55 nyuma y’uko Martin Zubimendi atakaje umupira.

Gutsinda uyu mukino byatumye Arsenal ikomeza kuyobora urutonde rw’agateganyo rwa Shampiyona mu buryo budasubirwaho irusha Chelsea ya kabiri amanota 6, Manchester City ya gatatu amanota 7 na Aston Villa ya 4 amanota 8.

Arsenal izongera gukina muri Premier League yakirwa na Chelsea tariki 30 Ugushyingo 2025.

Dore uduhigo 3 Eberech Eze yaciye nyuma yo gutsinda ibitego 3 mu mukino Arsenal yatsinzemo Tottenham:

  • Ni ubwa mbere Eberech Eze yaratsinze ibitego 3 ibizwi nka ‘hat-trick’ mu mukino umwe kuva yatangira gukina umupira w’amaguru nk’umukinnyi wabigize umwuga muri 2016 akinira Queens Park Rangers.
  • Eze niwe mukinnyi wa mbere mu mateka ya “North London Derby” wabashije gutsinda ibitego 3 mu mukino umwe aya makipe yahuye muri Premier League.
  • Eze yabaye umukinnyi wa kane mu mateka ya “North London Derby” ubashije gutsinda ibitego 3 mu mukino umwe mu marushanwa yose. Abandi bakinnyi babikoze ni Ted Drake wakiniraga Arsenal wabikoze mu 1934, Terry Dyson wakiniraga Tottenham wabikoze mu 1961 na Alan Sunderland wakiniraga Arsenal wabikoze mu 1978.

Umunya-Nigeria ariko ukinira ikipe y’igihugu y’Ubwongereza Eberech Eze w’imyaka 27 yageze muri Arsenal mu mpeshyi y’uyu mwaka avuye muri Crystal Palace kuri miliyoni 60 z’amapawundi.

Yagiye muri Arsenal nyuma y’uko yifujwe na Tottenham ariko akayitera umugongo.

Kugeza ubu Eze afite uruhare rw’ibitego 6 mu mikino 4 iheruka kumuhuza n’ikipe ya Tottenham Hotspur.

Mbere y’umukino umutoza Thomas Frank wa Tottenham yari yabajijwe kuri Eberech Eze ariko avuga ko atamuzi, uyu mukinnyi atazi niwe wamutsinze ibitego 3.