Intare na pumas zo mu kigo cyororerwamo inyamaswa (zoo) muri Africa y’Epfo zanduye Covid-19 ziyivanye ku bazorora, nk’uko ubushakashatsi bw’abahanga ba kaminuza ya Pretoria bubivuga.
Abo bahanga muri siyansi baraburira ku moko mashya y’iyi virus mu gihe “ibashije gutura neza mu mubiri w’inyamaswa” maze ikongera ikagaruka mu bantu.
Ubu bushakashatsi bwakozwe nyuma y’uko izi nyamaswa zirwaye zikerekana ibimenyetso bya Covid nk’iby’abantu bayirwaye – harimo kugorwa no guhumeka, ibicurane n’inkorora.
Ibipimo bya Covid kuri izi nyamaswa byerekanye ko zayanduye, nk’uko abo bahanga babivuga, amakuru yabo akavuga ko zishobora kuba zarandujwe n’abakozi bazitaho.
Abanditse ubu bushakashatsi bavuze ko abakozi b’iyi zoo bari bafite coronavirus ibazungurukamo icyo gihe ariko nta bimenyetso by’indwara bafite.
Abo bahanga bagiye inama yo gufata ingamba zo kwirinda kurushaho nko kwambara agapfukamunwa no kwirinda kwegerana cyane n’izo nyamaswa zo muri zoo.
Ubushakashatsi bwabo bwatangajwe no muri Journal Viruses.
Si ubwa mbere coronavirus ivuzwe mu nyamaswa zo muri zoo, mu 2020 ingwe zo muri zoo y’i New York muri Amerika bazisanzwemo Covid-19 bigakekwa ko zandujwe n’abantu.
