Ikipe ya REG W BBC yatsinze Zetech University yo muri Kenya naho APR W BBC itsinda Fox Divas yo muri Tanzania, iba imikino ya kabiri izi kipe zitsinze mu mikino yo gushaka itike ya Basketball League Africa y’abagore.
Kuri uyu wa kabiri tariki 11 Ugushyingo 2025 wari umunsi wa gatatu w’irushanwa ry’Akarere ka 5 (Zone 5) mu mikino yo gushaka itike y’Igikombe cy’Afurika cy’amakipe y’abagore, Women Basketball League Africa iri kubera i Nairobi muri Kenya muri Nyayo International Stadium.
REG W BBC y’umutoza Pape Malick Goudiaby iri mu itsinda B yamanutse mu kibuga ikina na Zetech University yo muri Kenya, uyu mukino warangiye REG itsinze amanota 88-44.
Umukinnyi Maiga Kadidia niwe witwaye neza muri uyu mukino atsinda amanota 15, akora rebounds 11, yiba umupira (Steals) inshuro 7.
Uyu wabaye umukino wa kabiri REG itsinze nyuma yo gutsinda Don Bosco Lady Lioness yo muri Tanzania ku Cyumweru tariki 9 Ugushyingo 2025.
REG izakina umukino wa nyuma w’amatsinda ku wa kane tariki 13 Ugushyingo saa 11:00 z’amanywa ku isaha y’i Kigali ikina na Les Hippos yo mu Burundi.
APR W BBC iri mu itsinda A yamanutse mu kibuga saa 15:30 ikina na Fox Divas yo muri Tanzania nyuma yo gutsinda Gladiators yo mu Burundi mu mukino wa mbere yakinnye kuri uyu wa mbere tariki 10 Ugushyingo 2025.
APR y’umutoza Mushumba Charles yitwaye neza muri uyu mukino itsinda Fox amanota 89-51.
Yacine Diop niwe witwaye neza muri uyu mukino atsinda amanota 15, akora rebounds 12, atanga imipira 2 yavuyemo amanota, yiba umupira (Steals) inshuro 2, akora ibihomo (Blocks) 2.
APR iragaruka mu kibuga kuri uyu wa gatatu tariki 12 Ugushyingo ikina na Stormers yo muri Uganda saa 15:30 z’umugoroba.
