Ikipe ya APR W BBC yatsinze REG W BBC ku mukino wa nyuma w’imikino y’akarere ka gatanu mu gushaka itike y’igikombe cy’Afurika cy’amakipe y’abagore, Women Basketball Africa League.
Kuri uyu wa gatandatu tariki 15 Ugushyingo 2025 hasojwe imikino y’akarere ka gatanu, Zone yaberaga i Nairobi muri Kenya muri Nyayo International Stadium yarigamije gushaka itike ya Women Basketball League Africa.
APR WBBC yageze ku mukino wa nyuma isezereye Les Hippos yo mu Burundi naho REG WBBC yageze ku mukino wa nyuma isezereye Kenya Ports Authority (KPA) yo muri Kenya, aya makipe yombi yageze ku mukino wa nyuma niyo yarahagarariye u Rwanda muri iyi mikino.
APR yatangiye neza itsinda agace ka mbere ku manota 22-12 ndetse yongera no gutsinda agace ka kabiri ku manota 18-16 ibifashijwemo na Destiney Philoxy watsinze amanota 12 mu gice cya mbere cy’umukino.
Mu gace ka gatatu REG y’umutoza Pape Malick Goudiaby yakoze iyo bwabaga ibasha gutsinda amanota 29 mu gihe APR yatsinze amanota 19 muri aka gace byatumye karangira APR ikiyoboye umukino n’amanota 59-57.
APR yongeye kwiharira agace ka kane itsinda amanota 23-11 bituma isoza umukino itsinze REG yatwaye igikombe cya Shampiyona y’u Rwanda amanota 82-68.
Umunya-Senegal yacine Diop ukinira APR niwe witwaye neza muri uyu mukino nyuma yo gutsinda amanota 16, akora rebounds 11, atanga imipira 4 yavuyemo amanota ndetse yiba umupira (Steals) ubugira kabiri.
APR yegukanye igikombe cya Zone 5 kiba icya mbere yegukanye biyiha itike yo kuzakina imikino ya Women Basketball League Africa izabera i Cairo mu Misiri tariki 5 Ukuboza kugeza tariki 15 Ukuboza 2025.
Ubushize APR yari yarangirije ku mwanya wa 3 mu mikino ya Women Baskestball League Africa yabereye i Dakar muri Senegal.
N’ubwo REG yatsindiwe ku mukino wa nyuma gusa nayo yabonye itike ndetse na Kenya Ports Authority (KPA) yegukanye umwanya wa gatatu nyuma yo gutsinda Les Hippos amanota 89-81.
