Kuri uyu wa gatandatu tariki 4 Mata 2026 ikipe ihagarariye u Rwanda mu mikino ya BAL 2026 mu itsinda (Conference) rya Kalahari yongeye kwitwara neza itsinda Dar City yo muri Tanzania amanota 104-92.
Nyuma yo gutsinda uyu mukino byatumye ikipe ya RSSB Tigers ikomeza kuyobora itsinda n’intsinzi 4 mu mikino 4 ndetse iguma kuba ariyo kipe yonyine itaratsindwa umukino n’umwe muri iri tsinda.
Igice cya mbere cy’umukino cyarangiye RSSB Tigers yitwaye neza yashyizemo ikinyuranyo cy’amanota 7 kuko yarifite amanota 52 ku manota 45 ya Dar City.
RSSB Tigers y’umutoza Henry Dennis Newton Mwinuka ntiyigeze iva mu mukino kuko yakomeje kuwuyobora no mu tundi duce tubiri tw’umukino.
RSSB Tigers yitwaye neza mu gace ka gatatu itsinda amanota 23-20 ndetse no mu gace ka kane itsinda amanota 29-27, umukino muri rusange urangira ari amanota 104 ya RSSB Tigers ku manota 92 ya Dar City.
Leonard Craig Randall II yaciye uduhigo tubiri muri BAL
Leonard Craig Randall II ukinira RSSB Tigers yaciye uduhigo tubiri muri uyu mukino turimo ako gutsinda amanota 3 menshi mu mukino umwe ndetse no gutsinda amanota menshi mu mukino umwe.
Leonard Craig Randall II yatsinze amanota atatu inshuro 11 ahita akuraho agahigo ka Axel Mpoyo bakinana muri iyi kipe wayatsinze inshuro 10 mu mukino umwe mu mateka ya BAL.
Leonard Craig Randall II yaciye akandi gahigo ko gutsinda amanota menshi mu mukino umwe wa BAL nyuma yo gutsinda amanota 54 muri uyu mukino, aka gahigo kari gafitwe na Joseph Lual-Acuil Jr. watsinze amanota 42 mu mukino umwe.
Uretse kuba Craig Randall II yatsinze amanota 54, yakoze rebounds 5, atanga imipira 6 yavuyemo amanota.
Mu bandi bakinnyi ba RSSB Tigers bitwaye neza muri uyu mukino barimo Antino Antino na Mangok Mathiang batsinze amanota 15 kuri buri umwe.
Bamwe mu bakinnyi ba Dar City bitwaye neza muri uyu mukino barimo Deng Junior Madut Ring na Uzodinma Daniel Jerry Utomi batsinze amanota 21 kuri buri umwe.
Muri rusange RSSB Tigers iracyayoboye itsinda, ikurikirwa na Petro de Luanda yo muri Angola, Al Ahly Ly yo muri Libya igakurikira ari iya gatatu, Dar City yo muri Tanzania iri ku mwanya wa kane, Nairobi City Thunder yo muri Kenya ni iya gatanu naho Johannesburg Giants yo muri Afurika y’Epfo ni iya nyuma muri iri tsinda rya Kalahari.
Kuri iki cyumweru tariki 5 Mata 2026 nibwo imikino yo muri iri tsinda irashyirwaho akadomo hakinwa imikino ibirim RSSB Tigers irakina na Nairobi City Thunder saa 15:00 naho Petro de Luanda ikine na Johannesburg Giants saa 18:00.