Ikipe ya RSSB Tigers ihagarariye u Rwanda mu mikino ya BAL 2026 mu itsinda rya Kalahari riri gukinira muri SunBet Arena i Pretoria muri Afurika y’Epfo yongeye kwitwara neza itsinda umukino wa gatatu muri itsinda, yihaniza Johannesburg Giants yari mu rugo iyitsinda amanota 102-89.
Kuri uyu wa gatatu tariki 1 Mata 2026 ikipe ya RSSB Tigers yamanutse mu kibuga ikina umukino wayo wa gatatu mu mikino y’amatsinda ihuza amakipe y’abaye aya mbere iwayo, BAL 2026 nyuma yo gutsinda imikino ibiri ibanza ari nayo yarigoye.
RSSB Tigers yari yatangiye itsinda Al Ahly Ly yo muri Libya, ubundi igatsinda Petro de Luanda yo muri Angola mu mukino wa kabiri, yagiye gukina umukino wa gatatu n’ubundi ihabwa amahirwe yo kwitwara neza gusa bamwe bakagira impungenge kuko itarifite Teafale Lenard Jr uri mu bakinnyi ngenderwaho kubera afite imvune y’ikirenge.
Umukino watangiye urimo imbaraga nyinshi ndetse amakipe akubana cyane ku buryo agace ka mbere karangiye Johannesburg Giants iyoboye umukino n’amanota 27-25.
RSSB Tigers yariri inyuma ho amanota abiri ntabwo yigeze yemera kurangiza igice cya mbere iri inyuma ahubwo yatsinze amanota 24-20 mu gace ka kabiri bituma amakipe yombi ajya kuruhuka ari amanota 49 ya RSSB Tigers ku manota 47 ya Johannesburg Giants.
Mu gace ka gatatu n’ubundi amakipe yombi yongeye gukubana ariko n’ubundi karangira RSSB Tigers igatsinzemo amanota 25-24 ndetse mu gace ka nyuma niho yarangirije umukino kuko yagatsinzemo amanota 28-18 bituma umukino urangira ari amanota 102-89.
Nubwo Teafale Lenard Jr atagaragaye kuri uyu mukino ariko bagenzi be barimo Leonard Craig Randall II watsinze amanota 39, akora rebounds 9 ndetse atanga n’imipira 5 yavuyemo amanota hamwe na Mangok Mathiang watsinze amanota 32, akora rebounds 17, atanga umupira umwe wavuyemo amanota bafashije RSSB Tigers kwitwara neza muri uyu mukino.
Jakobi Terrell Heady watsinze amanota 30, agakora rebounds 6 ndetse agatanga n’imipira 2 yavuyemo amanota na Nkosinathi Sibanyoni watsinze amanota 24, agakora rebounds 18 ndetse agatanga n’imipira 3 yavuyemo amanota ni bamwe mu bakinnyi ba Johannesburg Giants bagoye bikomeye ikipe ya RSSB Tigers.
Kuguma mu mukino kuva utangiye kugeza urangiye byabaye intwaro ikomeye yo kwegukana intsinzi ku ruhande rw’ikipe ya RSSB Tigers y’umutoza Henry Dennis Newton Mwinuka.
Kugeza ubu, ikipe ya RSSB Tigers niyo kipe yonyine itaratsindwa umukino n’umwe mu itsinda rya Kalahari biyiha kuriyobora ndetse kugeza ubu ikaba yamaze no kubona itike ya 1/4 cy’irangiza n’ubwo igisigaje gukina imikino ibiri.
Mu makipe 6 ari mu itsinda rya Kalahari, RSSB Tigers irayoboye n’intsinzi 3 mu mikino 3, Petro de Luanda ni iya kabiri n’intsinzi 2 mu mikino 3, Dar City yo muri Tanzania ni iya gatatu n’intsinzi 2 mu mikino 3, Al Ahly ni iya kane n’intsinzi 1 mu mikino 3, Nairobi City Thunder ni iya gatanu n’intsinzi 1 mu mikino 3 naho ikipe ya Johannesburg Giants ni iya nyuma muri iri tsinda nyuma yo gutsindwa imikino 3 yose imaze gukina.
Imikino yo mu itsinda rya Kalahari irakomeza kuri uyu wa gatanu tariki 3 Mata 2026:
Nairobi City Thunder 16:00 Al Ahly Ly
Petro de Luanda 19:00 Dar City BBC
Ikipe ya RSSB Tigers izasubira mu kibuga ku wa gatandatu, tariki 4 Mata 2026:
Dar City BBCÂ 16:00Â RSSB Tigers
Al Ahly Ly 18:00 Johannesburg Giants