Ikipe ya RSSB Tigers ihagarariye u Rwanda mu mikino nyafurika ihuza amakipe yabaye aya mbere iwayo, BAL 2026, yatsinze umukino wayo wa kabiri muri iri rushanwa itsinda Petro de Luanda yo muri Angola amanota 82-78 nyuma yo gutsinda Al Ahly yo muri Libya mu mukino wa mbere.
Kuri iki Cyumweru tariki 29 Werurwe 2026 ikipe ya RSSB Tigers iri mu itsinda rya Kalahari riri gukinira muri SunBet Arena i Pretoria muri Afurika y’Epfo yakinnye umukino wayo wa kabiri muri BAL 2026 ibasha gutsinda Petro de Luanda ifite igikombe cya BAL cyo muri 2024.
Ikipe ya Petro de Luanda yaje muri uyu mukino nayo ifite intsinzi imwe kuko yatsinze Al Ahly Ly yo muri Libya amanota 104-90.
Umukino watangiye amakipe yombi agendana yaba mu gace ka mbere ndetse no mu gace ka kabiri ku buryo igice cya mbere muri rusange cyarangiye ikipe ya Petro de Luanda iyoboye umukino n’amanota 36-34.
Mu gace ka gatatu, ikipe ya RSSB Tigers yakarangije yamaze gukuramo amanota 2 yari yashyizwemo ndetse ishyiramo n’irindi nota rimwe kuko yatsinze aka gace ku manota 23-20.
Mu gace ka kane ari nako kashyize iherezo kuri uyu mukino amakipe yombi n’ubundi yakomeje kugendana runono ariko ikipe ya RSSB Tigers yongeye kwitwara neza igatsinda ku manota 25-22 ibikesha amanota atatu yatsinzwe na Antino Alverazes Jackson habura amasegonda 5 ngo umukino urangire ndetse n’inota rimwe yatsinze habura isegonda rimwe ngo umukino urangire ndetse aya manota 4 niyo yonyine yatsinze muri uyu mukino.
Umukino warangiye RSSB Tigers itsinze harimo ikinyuranyo cy’amanota 4 kuko yatsinze amanota 82-78.
Muri rusange Teafale Lenard Jr yitwaye neza muri uyu mukino atsindira RSSB Tigers amanota 26, akora rebounds 4 ndetse atanga imipira (Assits) 3 yavuyemo amanota, yambura umupira (Steals) inshuro 3.
Mu bandi bakinnyi ba RSSB Tigers y’umutoza Henry Dennis Newton Mwinuka bitwaye neza muri uyu mukino barimo Mangok Mathiang Ayub watsinze amanota 18, akora rebounds 12 ndetse atanga imipira 2 yavuyemo amanota na Leonard Craig Randall II watsinze amanota 15, akora rebounds 3, atanga n’imipira 2 yavuyemo amanota.
Childe Dundao wa Petro de Luanda y’umutoza Sergio Sergio Valdeolmillos Moreno ni umwe mu bagoye ikipe ya RSSB Tigers kuko yatsinze amanota 19, akora rebounds 2 ndetse atanga imipira 4 yavuyemo amanota naho Javilon Coleman Blake yatsinze amanota 13, akora rebounds 4 ndetse atanga imipira 3 yavuyemo amanota.
Gutsinda uyu mukino byongereye ikipe ya RSSB Tigers amahirwe yo kurangiza imikino y’itisinda iri mu makipe 4 ya mbere azerekeza muri 1/4 cya nyuma cy’irangiza mu mikino izabera i Kigali muri BK Arena cyane ko aya makipe abiri yatsinze yari mu makipe ahabwa amahirwe yo kwitwara neza muri rusange.
Nyuma y’uyu mukino hakurikiyeho umukino w’undi wo mu itsinda rya Kalahari wahuje ikipe ya Johannesburg Giants BBC yo muri Afurika y’Epfo n’ikipe ya Nairobi City Thunder yo muri Kenya utangira saa kumi n’ebyiri z’umugoroba ku isaha y’i Kigali inahura n’isaha yo muri Afurika y’Epfo.
Mbere y’uko uyu mukino ukinwa, Dar City yo muri Tanzania ni iya mbere mu itsinda rya Kalahari n’intsinzi ebyiri mu mikino ibiri ya mbere inganya na RSSB Tigers ya kabiri n’intsinzi ebyiri , Petro de Luanda ni iya gatatu n’intsinzi imwe, Al Ahly Ly yo muri Libya ni iya gatatu nyuma yo gutsindwa imikino 2, iya kane ni Nairobi City Thunder imaze gutsindwa umukino umwe ndetse na Johannesburg Giants BBC nayo yatsinzwe umukino umwe.